آ تجھے بانہوں کے جھولے میں سلا دیتا ہوں ( غریب باپ کا پیار )

Beti Poetry

تیری معصوم اداؤں کو دعا دیتا ہوں
آ تجھے بانہوں کے جھولے میں سلا دیتا ہوں

میری ننھی سی کلی تجھ پہ آئے نہ خزاں
تیری آنکھوں میں رہیں عمر بھر خوشیاں جواں
تجھ پہ چھائے نہ کبھی درد کا موسم کوئی
تیرے گلشن میں رہے مہکی بہاروں کا سماں

تجھ کو احساس کے پھولوں سے سجا دیتا ہوں
آتجھے بانہوں کے جھولے میں سلا دیتا ہوں

اپنے احساس کے اظہار تو دے سکتا ہوں
مفلسی لاکھ سہی پیار تو دے سکتا ہوں
تجھ کو بجلی کے کھلونوں سے میں بہلا نہ سکا
جھوٹے موتی کے بنے ہار تو دے سکتا ہوں

تیری خاطر تو میں غم اپنے بھلا دیتا ہوں
آ تجھے بانہوں کے جھولے میں سلا دیتا ہوں