باتیں

کچھ باتیں ایسی ہوتی ہیں
جو سب سے کہنا پڑتی ہیں
کچھ باتیں ایسی ہوتی ہیں
خود سے بھی چھپانا پڑتی ہیں
کچھ باتیں بات بناتی ہیں
کچھ باتیں آگ لگاتی ہیں
کچھ باتیں مصرعے بُنتی ہیں
اور دل میں گھر کر جاتی ہیں
کچھ باتیں ایسی ہوتی ہیں
آنکھوں سے کَہ دی جاتی ہیں
کچھ باتیں ایسی ہوتی ہیں
جو پہلے تولی جاتی ہیں
اور بعد میں بولی جاتی ہیں
کچھ باتیں تلخ سی یادوں کا
مرہم بن جایا کرتی ہیں
کچھ باتیں دل کے کمرے کو
چپ چاپ جلایا کرتی ہیں
کچھ باتیں ، باتیں کرتی ہیں
کچھ باتیں پھندا بنتی ہیں
کچھ باتیں تنہا روتی ہیں
کچھ باتیں تنہا ہنستی ہیں