تمہیں چھپ چھپ کے تکنے کا مزہ کچھ اور ہی ہے

خاک چھانی ہے میری سوچ نے جہانوں کی
تیری راہ میں بکھرنے کا مزہ کچھ اور ہی ہے

یوں تو ہر ورق ہے یکتا کتاب ہستی کا
تیرے الفاظ پڑھنے کا مزہ کچھ اور ہی ہے

ہزاروں پھول نگاہوں کو بھلے لگتے ہیں
تمہیں چھپ چھپ کے تکنے کا مزہ کچھ اور ہی ہے

تمہیں ہر وقت کھوجتی ہیں میری آرزوئیں
تیرے سانچے میں ڈھلنے کا مزہ کچھ اور ہی ہے

راستے وجد کی حالت میں رقص کرتے ہیں
تمہارے ساتھ چلنے کا مزہ کچھ اور ہی ہے

خواب سے دلنشیں لمحے آغوش میں لے کر
چاند تارے پکڑنے کا مزہ کچھ اور ہی ہے

تیرے ہاتھوں کی بولتی ہوئی لکیروں میں
حنا کے رنگ بھرنے کا مزہ کچھ اور ہی ہے

وصال و ہجر کے سارے فسانے اپنی جگہ
بچھڑ کر پھر سے ملنے کا مزہ کچھ اور ہی ہے

تمہاری جھیل سی آنکھوں کا عجب مستی میں
اٹھ کے فی الفور جھکنے کا مزہ کچھ اور ہی ہے