تنقید اور تخلیق

آپ کی شاعری صرف خوشبو ہے
دل میں اترتی ہوئی
روح پر شبنمی ہاتھ رکھتی ہوئی
یہ مگر------ ذہن کو صرف ہلکے سے چُھو کر گزر جائے گی
آپ اسے رنگ کا پیرہن دیجئیے
کوئی آدرش اونچا، انوکھا عقیدہ، کوئی گھنجلک فلسفہ
سخت ناقابلِ فہم الفاظ میں پیش کرنے کی کوشش کریں
آپ کی سوچ میں کچھ تو گہرائی ہو

آپ سچ کہہ رہے ہیں
مگر----- دیکھیئے نا------ ابھی میرا فن کچی عُمروں میں ہے
(آپ اسے خواب ہی رہنے دیجئیے)
(اتنی گمبھیر دانشوری میں نہ الجھائیے)
میں نہیں چاہتی------ کہ میرا فن
جواں ہونے سے قبل ہی بوڑھا ہو جائے
اور فلسفے کا عصا لے کر چلنے لگے