خیال خاطر، اہل و عیال کیا کرتا

خیال خاطر، اہل و عیال کیا کرتا
میں روز حشر، کسی کا خیال کیا کرتا

مرے ضمیر نے لب سی کے رکھ دیے میرے
میں دنیا والوں کے آگے سوال کیا کرتا

جو مانگا دل تو نچھاور حیات بھی کردی
خوشی تھی ان کی بھلا میں ملال کیا کرتا

دم اخیر وہ زلفوں سے دے رہے تھے ہوا
حیات و موت کا اس دم خیال کیا کرتا

بنا کہ اپنا مجھے بخش دی ہے رسوائی
تو کوئی اور میری دیکھ بھال کیا کرتا

سوال دید پہ شعلوں کی ہو گئی بارش
اب اس کے بعد سوالی، سوال کیا کرتا

جو میکدے میں رنگے ہاتھ دھر لئے جاتے
تو رند حضرت صوفی کا، حال کیا کرتا

تمہیں تو چاند بنا کر زمیں پہ بھیجا ہے
میں ایک تارہ تھا "اختر" کمال کیا کرتا