دل میں الفت کا ہے ارمان تو ملنے آنا

دل میں الفت کا ہے ارمان تو ملنے آنا
میری ہو جائے جو پہچان تو ملنے آنا

دوستوں سے بھی کروں گا نہ کبھی ذکر ترا
مجھ پہ تھوڑا سا بھی ہے مان تو ملنے آنا

گر ہو رسوائی کا ڈر گھر سے نکلنا نہ کبھی
ہاں اگر ملنا ہو آسان تو ملنے آنا

بھیگے موسم میں محبت کا مزہ ااپنا ہے
جب بھی بارش کا ہو امکان تو ملنے آنا

درد دینا نہ اسے پیار سے سمجھا لینا
گر ستائے دل نادان تو ملنے آنا

ڈھونڈتی ہے ترے قدموں کو مری تنہائی
چاہو کرنا کوئی احسان تو ملنے آنا

اپنی سوچوں کے جزیروں میں ٹہلتے تنہا
تم جو ہو جاؤ پریشان تو ملنے آنا

بارشیں پیار کی برسیں تو صدا دے لینا
دل میں اٹھنے لگیں طوفان تو ملنے آنا

جب خیالوں سے کبھی مجھ کو ہٹا نہ پاؤ
خواب بھی میرے ہوں ہر آن تو ملنے آنا