دل وچ لے کے گھور پلیتی

دل وچ لے کے گھور پلیتی
آن وڑے کجھ لوک مسیتی

نواں نکور مصلی ڈاہیا
دل دے نال نماز نہ نیتی

ساری عمر نشے وچ رہندا
عشق شراب جنھیں وی پیتی

نظراں دے دھاگے نال اوہنے
دل دی پھٹی کڑتی سیتی

پٹے لکھاں گھر دنیا وچ
جھوٹے رسم ، رواجاں ، ریتی

دنیا نوں میں کیہہ کیہہ دساں
میری نال ہے جو وی بیتی

چانواں نال میں دل دتا سی
کر چھڈیا توں پھیتی پھیتی

ساری دنیا توں سوہنی اے
عذرا ساڈی مادر گیتی