شب فراق ہے اور اضطراب طاری ہے

شب فراق ہے اور اضطراب طاری ہے
نفس نفس میں مگر تیرا نام جاری ہے

عزیز کیوں نہ رکھوں دل سے میں غمِ جاناں
رگوں میں خون نہیں کرب و غم ہی جاری ہے

تمہارے نام سے چلتی ہے میری نبضِ حیات
یہ دل تمہارا ہے یہ زندگی تمہاری ہے

کہو لٹا دوں گُل و غنچہ و بہارِ چمن
قسم تمہاری مری باغباں سے یاری ہے

مجھے یقین ہے وہ آج آنے والے ہیں
خدایا خیر عجب دل کو بے قراری ہے

ترے وجود سے اظہارِ رنگ و نور ہوا
ترے جمال سے یہ کائنات پیاری ہے

بچھڑ کے ان سے بہت ہی ملال ہے اختر
ہو دن کہ رات ہمہ وقت سوگواری ہے