لے کے تن من میں اگن شعلہ بدن ہم نکلے

برگ گل بن کے نہ تو بن کے سمن ہم نکلے
تیری نظروں میں فقط خار چمن ہم نکلے

جب بھی خطرہ ہوا لاحق تری سیماؤں کو
باندھ کر سر پہ کفن میرے وطن ہم نکلے

روشنی دے نہ سکے چھینے غریبوں کے د ئے
بننا تھا نجم وطن ننگ وطن ہم نکلے

بستیاں چھان لیں انسان نہ پائے ہم نے
لے کے آشا کی کرن دشت و دمن ہم نکلے

گزرے کوچے سے ترے آج جو انجانے میں
لے کے تن من میں اگن شعلہ بدن ہم نکلے

ہر قدم راہ سخن پر ملے ‘ استاد‘ ہمیں
ان سے کچھ سیکھنے آداب سخن ہم نکلے

تھا زمانے سے چھپانا ہمیں چہرہ اپنا
زیب تن کر کے ‘ حسن ‘ پیت وسن ہم نکلے