ناراض نہ ہو ہم سے

ناراض نہ ہو ہم سے
اے رازداں ہمارے
ہم لا ئیں گے چُرا کر
خوشیوں کے پل تمہارے

مانا کہ بَہر سو ہیں
تاریکیوں کے ڈیرے
لیکن تُجھے خطر کیا
ہم ہیں تیرے شرارے

آنے دو آندھیوں کو
بڑھنے دو مُشکلوں کو
ہم جَھیل لیں گے تنہا
تیرے سبھی خِسارے

اُڑنا ہے ساتھ لیکر
تم کو سطحِ اَبر تک
جَڑنے ہیں ہم کو تیری
پوشاک پر سِتارے

لانا ہے دسترس میں
لوح و قلم کو ہم نے
کب تک جئیں گے آخر
تقدیر کے سہارے

کرتے نہیں ہیں شکوہ
درماں سے عشق والے
کرتے ہیں خُوب اپنے
دردوں کے آپ چارے

خاموش باش ہم تم
عزلت میں دن گُزاریں
دارِ سُخن کے شہری
ہیں شورشوں کے مارے

ہم رازِ جانِ گوہر
ہو جاؤ راضی اب تو
خوش خوش گُزار جائیں
دو چار دن ہیں سارے