وہ جو عاشق بھی ہے شاعر بھی ندیم

زندگی پیار کا ارماں ہوگا
موت تو حاصلِ ساماں ہوگا

دیکھنے میں رخِ شاداں ہوگا
دل مگر شہرِ خموشاں ہوگا

حال کب یونہی پریشاں ہوگا
درد دل میں کوئی پنہاں ہوگا

چاہے ہنستے ہی کیا ہو رخصت
ایک آنسو سر ِ مژگاں ہوگا

یہ پھٹا کپڑا جو ہے چار گرہ
یہ تو عاشق کا گریباں ہوگا

لاکھ ہوں دشت و بیاباں رہ میں
اس کا گھر روضئہ رضواں ہوگا

تجھ سے ملنا ہے یہ ہے عزم مگر
لرزہ ء عمرِ گریزاں ہوگا

اس کا بچنا ہے بہت ہی مشکل
زخمیئ ناوکِ مژگاں ہوگا

وہ جو عاشق بھی ہے شاعر بھی ندیم
وہ غزلخواں شبِ ہجراں ہوگا

اس کو ڈھونڈو تو سہی آج ندیم
وہ چراغ ِ تہِ داماں ہوگا