چراغ گُل تھا بسر رات کسطرح کرتی

چراغ گُل تھا بسر رات کسطرح کرتی
میں روشنی سے بھلا بات کسطرح کرتی

میں انتہائی پریشانیوں کے عالم میں
تمہی کہو گزراوقات کسطرح کرتی

نہ میرے بس میں فضا تھی نہ موسِموں کی ہوا
علاجِ تلخیٔ لمحات کسطرح کرتی

ابھی پرانے دکھوں سے نبٹ نہیں پائی
نئے دکھوں سے ملاقات کسطرح کرتی

نہ انتظامِ کفن تھا نہ دفن کا ساماں
قبول مرگِ مفاجات کسطرح کرتی

خدا ہی نے تو مجھے امتحاں میں ڈالا تھا
پھر اُس سے شکوہ ء حالات کسطرح کرتی

وہ جرمِ ہستی سے از بس زیادہ تھی عاشی
میں احترامِ مکافات کسطرح کرتی