کب کوئی موسم رکا ہے جانتے ہیں سب یہ بات

کب کوئی موسم رکا ہے جانتے ہیں سب یہ بات
وقت پر ہوتی ہے صبح ، وقت پر ڈھلتی ہے رات

دینے والا ہاتھ ہوتا ہے ہمیشہ بالا تر
حشر تک پھییلا رہے گا مانگنے والے کا ہاتھ

چند لمحوں کی مسرت ڈال دامن میں مرے
عمر بھر کس نے دیا ہے ایک بیگانے کا ساتھ

جب سے میں نے سر زمینِ فکر پہ رکھا قدم
بدلی بدلی لگ رہی ہے مجھ کو ساری کائنات

بات چھوٹی سی ہے لیکن یاد رکھنا تم اسے
چاہتوں کے کھیل میں تو جیت سے بہتر ہے مات

ہم ہی ناداں تھے نہ جو پہچان پائے آپ کو
دو قدم چل کر دکھا دی آپ نے تو اپنی ذات

جو بھی ہے موجود دنیا میں ، وہ سب مٹ جائے گا
اس جہاں میں کیا ہے ایسا جس کو حاصل ہے ثبات

ذرے ذرے میں ہیں پنہاں سب خدا کی قدرتیں
گیت گاتے ہیں اسی کے ڈالی ڈالی پات پات

دل کا یہ عالم ہے عذراؔ جب بھی یاد آتے ہیں وہ
آنسوؤں میں ڈوب جاتی ہے ہماری چاند رات