کیہ دساں میں کیہڑی گلوں جتی بازی ہار گیا

کیہ دساں میں کیہڑی گلوں جتی بازی ہار گیا
جیہنوں منصف پایا اوہو مینوں ہار گیا

لہو رنگا اوہ اتھرو جیہڑا پلکیں زوریں ڈگیا سی
ڈگدا ڈگدا کئی سجناں دے پیار دا بھار اتار گیا

نہر کنارے میلا لگیا لوکیں پچھدے پھردے نیں
ڈبن والا کاغذ دی اک بیڑی کاہنوں تار گیا

تیری اکھ سہارا دتا میریاں ٹٹیاں آساں نوں
تیرا اک دلاسا چناں میرا بت سار گیا

کندھاں ات ہنیرے دیاں ڈھا کے وی میں قید رہیا
چن چڑھیا تے میرے گر دے چانن کندھ اسار گیا

اک اٹی توں پیار دا سودا ایتھوں لبھنا ایں
جدھر ٹر گئے حسن دے بیوپاری اودھر اوہ بازار گیا

ایہو اک وڈیائی میری میں بوہا کھڑکایا نہیں
وچ خیالیں بھاوی اوہدے بوہے لکھا وار گیا

کوئی موت بہانہ یارو میری موت نوں ملیانہ
مینوں اپنے اندروں اٹھدا ہویا ہوکا مار گیا

پرلے پار اڈیکن والے بزدل کہہ کے ٹر گئے نیں
ارلے کنڈھے آکھن لوکیں انور پرلے پار گیا۔