ہے تمہاری آزمائش

ہے تمہاری آزمائش لا سکو گے تاب میں
ہے عیاں ہونے کی خواہش جلوہ نایاب میں

ہے اسے سب کچھ میسر پھر ہے کیسی جستجو
کس لیے بے چین ماہی پھر رہی ہے آب میں

اس کتاب زیست کا ہر ایک پہلو ہے نیا
آرزو لیکن وہی ہے اس کے ہر اک باب میں

کر دیا ہے میں نے خود کو اس طرح تیرے سپرد
جیسے خوشبو قید ہو جائے گل شاداب میں

اس نے زیر لب کیے تھے مجھ سے کچھ ایسے سوال
لاجواب آخر ہوئی میں محفل زرتاب میں

میں نے تو پردہ ہٹایا تھا رخ روشن سے بس
مچ گئی یہ کھلبلی پھر کیوں بھلا مہتاب ہیں

مانگے اس نے عاجزی سے زیست کے کچھ پل میرے
میں مگر انکار کر پائی نہیں آداب میں

داستان عشق گر کرنی پڑی مجھ کو رقم
زندگی کا میں تمہیں حاصل لکھوں القاب میں

سوچ تھی اس کی محافظ اور پہرے دار ضبط
دیکھ لی ہے وہ حقیقت میں نے عنبر خواب میں