آگہی کی جستجو

زندگی فصلِ بہاراں ہے تو میں دانا کہ خول
زندگی اسٹیج تو کردار ہوں میں یا کہ بول

زندگی سیل تجارت ہے تو میں تاجر کہ مال
زندگی گہرا سمندر ہے تو میں ماہی کہ جال

زندگی ہے عشق تو ہوں ہجر کہ بوس و کنار
زندگی ہے گلستاں تو پھول ہوں میں یا کہ خار

زندگی مایا تو پھر داتا کہ میں کشکول ہوں
زندگی کنواں تو میں پانی کہ اسکا ڈول ہوں

الغرض! ہوں جب سے، خود کو ڈھونڈتا ہوں کُو بہ کُو
عمر بھر کی ہے مسافت آگہی کی جستجو