اَدائیں حشر جگائیں ، وُہ اِتنا دِلکش ہے

اَدائیں حشر جگائیں ، وُہ اِتنا دِلکش ہے
خیال حرف نہ پائیں ، وُہ اِتنا دِلکش ہے

بہشتی غنچوں میں گوندھا گیا صراحی بدن
گلاب خوشبو چرائیں ، وُہ اِتنا دِلکش ہے

صفر ، صفر ہیں فقط اِس لیے کہ کر نہ سکیں
شمار اُس کی اَدائیں ، وُہ اِتنا دِلکش ہے

شراب اُنڈیلے کوئی اُس کے ہوتے ناممکن
گلاس خالی چڑھائیں ، وُہ اِتنا دِلکش ہے

غضب کا نور ہے چہرے پہ اُس کے نام کی تو
فقیر دیگ چڑھائیں ، وُہ اِتنا دِلکش ہے

خیال ایسا کہ سوچوں کے سر سے پگڑی گرے
اَرسطو اُنگلی چبائیں ، وُہ اِتنا دِلکش ہے