بیٹی کی رخصتی پر

فطرت کا تقاضا ہے مَیکَے سے ہی جانا ہے
تو اب سسرال اپنا مسکن ہی بنانا ہے

میں نے تو جتن سے اور نازوں سے تجھے پالا
ہر لمحہ ترے رخ کو نیکی کی طرف ڈالا

اب تجھ کو جدا کرکے بس نیر بہانا ہے
فطرت کا تقاضا ہے میکے سے ہی جانا ہے

دل میں یہ دعائیں ہیں بس چین سے جینا ہو
ڈوبے نہ کبھی تیرا بس ایسا سفینہ ہو

قدموں سے ترے خوشیاں بس عود کر آنا ہے
فطرت کا تقاضا ہے میکے سے ہی جانا ہے

جیون میں ترے ہردم بس سکھ کی گھٹا چھائے
خدمت سے تری سب کو بس پیارہی آجائے

محنت سے کبھی تجھ کو نہ جی ہی چُرانا ہے
فطرت کا تقاضا ہے میکے سے ہی جانا ہے

بس فکر رہے اس کی شکوہ نہ شکایت ہو
ہو تیرا سخن ایسا جس میں ہی حلاوت ہو

جیون میں کسی کا بھی نہ دل ہی دُکھانا ہے
فطرت کا تقاضا ہے میکے سے ہی جانا ہے

بس صبر و تحمل سے جیون ہی بِتانا ہے
ہو کوئی پریشانی ساہس نہ گنوانا ہے

اے لاڈلی تجھ کو بھی کانٹوں سے نبھانا ہے
فطرت کا تقاضا ہے میکے سے ہی جانا ہے