جب ہم اُس سے جدا ہوئے ہوں گے

عشق جز کار رایگاں کچھ نئیں
وہ جو لگتا ہے جاوداں کچھ نئیں

خوب ہے بحث گو عقیدے کی
کیا یقین اور کیا گماں کچھ نئیں

یہ عجب ایک بات سی کیوں ہے
گر ترے میرے درمیاں کچھ نئیں

پڑھ چکا ہوں میں داستانِ وجود
وہ بھی افسوس جز گماں کچھ نئیں

یہ بتا تُو کہاں پہ رہتا ہے
ذات اور دِل کے درمیاں کچھ نئیں

رائگاں ہیں سبھی وجود اور عدم
یہ زمین تو کیا آسماں کچھ نئیں

آگ تو کیا بلکہ آگ کا سب کچھ
یعنی لُو، شعلہ اور دھواں کچھ نئیں

وہ جہاں ہے وہاں تو کچھ بھی نہیں
میں یہاں ہوں کہاں؟ یہاں کچھ نئیں