حسن لیلیٰ نظر نہیں آتا

حسن لیلیٰ نظر نہیں آتا
وہ سراپا نظر نہیں آتا

کوئی رسوا نظر نہیں آتا
سر میں سودا نظر نہیں آتا

بے حسی چھا گئی ہے چاروں طرف
کوئی اپنا، نظر نہیں آتا

ہے خزاں کی لپیٹ میں گلشن
پھول کھلتا نظر نہیں آتا

چین آتا نہیں ہمیں، جب تک
تیرا چہرا نظر نہیں آتا

شور اٹھتا نہیں سر محفل
وہ تقاضا نظر نہیں آتا

آدمی ہے شکار دام سخن
ربط معنی نظر نہیں آتا

ہر طرف تیرگی کے بادل ہیں
ان کا جلوا نظر نہیں آتا

مسکرا کے، کبھی وہ بات کریں
ایسا ہوتا، نظر نہیں آتا

چشم بینا کا ہونا اپنی جگہ
دل بینا نظر نہیں آتا

مجھ کو تسکین کا کوئی لمحہ
میرے مولا ! نظر نہیں آتا

وہ پس پردہ چھپ گئے جا کر
پردہ اٹھتا نظر نہیں آتا

ہر طرف ہے سکوت کا عالم
لب گویا نظر نہیں آتا

وہم دوئی مٹا کے دیکھے کوئی
اپنا ہونا، نظر نہیں آتا

حسن جاناں کا دہر میں رومی
کون شیدا نظر نہیں آتا