خزاں کے دور میں پھولوں کی آرزو کیسی

جو مل سکیں نہ کبھی ان کی جستجو کیسی
خزاں کے دور میں پھولوں کی آرزو کیسی

لبوں کا کام نگاہوں سے کیوں نہیں لیتے
اثر جو کر نہ سکے پھر وہ گفتگو کیسی

تجھے اے دوست سلیقہ بھی دشمنی کا نہیں
یہ جنگ مجھ سے رقیبوں کے روبرو کیسی

معیار پیسہ ہو توقیر آدمی کے لیے
تو مفلسوں کی زمانے میں آبرو کیسی

جگر کا خون بھی دینے سے کچھ نہیں حاصل
شجر سے ٹوٹی ہوئی شاخ کی نمو کیسی

میں کیوں نہ مانگ لوں صحرا کی ریت سے پانی
جو پیاس اور بڑھا دے وہ آب جو کیسی

یہ کون جھونکے کی طرح گزر گیا زاہد
مہک ہواؤں میں پھیلی ہے چار سو کیسی