سینے میں تھا جو دل وہ ہمارا نہیں رہا

اب دھڑکنوں کا اِس پہ اجارہ نہیں رہا
سینے میں تھا جو دل وہ ہمارا نہیں رہا

دریا کے پار پھر ہُوا دریا کا سامنا
اب پانیوں کا کوئی کنارہ نہیں رہا

یُوں ابر آسمانِ تحیُر پہ چھاگئے
تسکین کا تو ایک بھی تارا نہیں رہا

بے خوف دل کی راکھ میں اب ہاتھ پھیر لو
چنگاری کوئی، کوئی شرارہ نہیں رہا

جذبِ نہاں عیاں ہو، مجھے بس تمام دے
اب میرا بے بسی سے گزارا نہیں رہا

ٹوٹی ہُوئی عمارتِ جاں کیسے ٹھیک ہو
اِک اینٹ بھی لگانے کو گارا نہیں رہا

اب مطمئن ہُوں سونپ کے تقدیر کو میں سب
ہونے کو، کوئی بھی تو خسارہ نہیں رہا

عاشی نہ جانے کس گھڑی گِر جائے آسمان
تھامے تھا جو فلک، وہ سہارا نہیں رہا

دل کے آپریشن کے بعد ہوش میں آتے ہی آئی سی یو میں کہی گئی غزل