شاعری محبت ہے (دوبارہ)

شاعری رفاقت ہے شاعری محبت ہے
شاعری تخیل ہے شاعری حقیقت ہے

اشکوں کا تبسم ہے درد میں شفا یہ ہے
شاعری لطافت ہے شاعری حلاوت ہے

ذہن و دِل کی وادی میں اس طرح اترتی ہے
شاعری کا ہو جانا جیسے ایک عنایت ہے

بےقرار لمحوں میں یہ قرار دیتی ہے
بےسکون لمحوں کی پرسکون دولت ہے

اپنے تک محدود رکھنے کے لئے نہیں ہوتی
شاعری امانت ہے شاعری وراثت ہے

اعلٰی و ارفعٰ خیال پیش کئے جائیں تو
شاعری رحمت ہے شاعری عبادت ہے

دِل کی رازدان ہے دِل کی بات کہتی ہے
دِل کے نازک جذبوں کی شاعری ضرورت ہے

عظمٰی رازداں بھی ہے میری ہمنوا بھی ہے
میرے لئے شاعری بیش بہا نعمت ہے