منظر سے پسِ منظر میں

منظر سے پسِ منظر میں
جانا کیوں ضروری ہے
کچھ خوابوں کو پانے میں
کئی خوابوں کو کچھ عرصہ
چھپانا کیوں ضروری ہے
بتانا کیوں ضروری ہے کہ
اب کی بار میں خود بھی
اپنی کسی تمنا کو
یکسر بھول جانے کی
کیوں کوشش میں رہتا ہوں
سوچتا ہوں کہ
لَوٹ آئیں گے
شاید وہ لمحے اب بھی
میں جن سے روشنی لے کر
نئی راہوں کو پا لوں گا
سجا لوں گا نئے خوابوں کو
اپنی ساکت آنکھوں پر
جو ہیں قید میں اب تک
انہی بیتے لمحوں کی
جہاں پہ خواب ٹوٹے تھے
جہاں پہ مان ٹوٹا تھا
میرے پُرجوش جذبوں کا
ہر ارمان ٹوٹا تھا
جو اِک مدت سے دل میں تھا
وہ مہمان روٹھا تھا
کوئی پوچھے تو کہہ دوں میں
بتا دوں میں سبھی باتیں
کہ منظر سے پسِ منظر میں
جانا کیوں ضروری ہے