میں اس سے دور ہوں یہ دل ہے بے قرار بہت (گیت)

میں اس سے دور ہوں یہ دل ہے بے قرار بہت
وطن کی مٹی پہ آتا ہے مجھ کو پیار بہت

مرا وطن تو زمیں پر ہی ایک جنت ہے
خدا کا لاکھ کرم ، اس کی خاص رحمت ہے
ہر ایک چیز پہ دیکھو تو ہے نکھار بہت

وطن کی مٹی پہ آتا ہے مجھ کو پیار بہت

حسیں فضائیں ہر اک سمت گنگناتی ہیں
ہوائیں جھوم کے چلتی ہیں ، مسکراتی ہیں
شجر شجر پہ اترتی ہے نو بہار بہت

وطن کی مٹی پہ آتا ہے مجھ کو پیار بہت

ہے ماں کی گود وطن کی زمین میرے لیے
کہ اس سے بڑھ کے نہیں کچھ حسین میرے لیے
قدم قدم پہ ہیں قدرت کے شاہکار بہت

وطن کی مٹی پہ آتا ہے مجھ کو پیار بہت

اگرچہ زیست میں میری کوئی کمی تو نہیں
وطن سے دور خوشی بھی مگر خوشی تو نہیں
کہ یاد آتے ہیں بچپن کے دوست یار بہت

وطن کی مٹی پہ آتا ہے مجھ کو پیار بہت

ہو اختیار تو اڑ کر وہاں چلا جاؤں
نجانے کیسا ہے اب میرا وہ حسیں گاؤں
اگے تو آج بھی ہوں گے وہاں چنار بہت

وطن کی مٹی پہ آتا ہے مجھ کو پیار بہت

جو کھیلتی تھی کبھی ساتھ یاد آتی ہے
پری وہ خوابوں میں آ کر مجھے ستاتی ہے
کیا تو ہو گا مرا اس نے انتظار بہت

وطن کی مٹی پہ آتا ہے مجھ کو پیار بہت

بچھڑ کے اپنوں سے پردیس میں ٹھکانا ہے
وہ اک زمانہ تھا اور یہ بھی اک زمانہ ہے
اکیلا رہ کے میں ہونے لگا بیزار بہت

وطن کی مٹی پہ آتا ہے مجھ کو پیار بہت

میں اس سے دور ہوں یہ دل ہے بے قرار بہت
وطن کی مٹی پہ آتا ہے مجھ کو پیار بہت