پِپلاں اُتّے پاپے ہوندے

پِپلاں اُتّے پاپے ہوندے
کون اُگاوے آپے ہوندے

بچ کے مچھی اِک نہ جاندی
ساڈھے کول جے ٹاپے ہوندے

وِچ بسنت بچن کِنج گُڈیاں
مُنڈیاں دے ہتھ چھاپے ہوندے

پاندھیاں نُوں کِیہ ڈَر وَاٹاں دا
اوہناں رستے ناپے ہوندے

ڈاڈھے پکّے حساب اوہ رکھدے
جِنہاں دے ہتھ کاپے ہوندے

محکمیاں دا حال نہ پُچھو
تھاں تھاں ایتھے گھاپے ہوندے

پُت کپتّر ہو جاندے نیں
ماپے نہیں کماپے ہوندے

دِھی پُتّر دا حق جو مارن
اوہ تے فِر نہ ماپے ہوندے

جھوٹھے پیاراں والے بزمی
میتھوں نہیں سیاپے ہوندے