کمالِ حسنِ سخن ساعتِ جنوں میں ہوا

کمالِ حسنِ سخن ساعتِ جنوں میں ہوا
خرد کو ہوش ملا کربِ جاں سکوں میں ہوا

گمان جب سے ہوا آشنا سوزِ دروں
زباں کو ِاذن ملا حوصلہ لبوں میں ہوا

تیرے جمال کا پرتو وہ ترا تیرِ نظر
جگرکو چیرتا شامل مری رگوں میں ہوا

مرا ہنر مرا ذوقِ سخن یہ نغمہ گری
ترے خیال میں کھو کر ترے فسوں میں ہوا

غریبِ شہر کو فرصت کہاں گناہوں کی
ہراک لمحہ بسر مشقِ خاک و خوں میں ہوا

مرا ضمیر ہے منصف مری خطاؤں كا
مرا حسابِ خطا آتشِ دروں میں ہوا