ہوتی ہے

تن کی صفائی سے بڑھ کر من کی صفائی ہوتی ہے
نیک عمل دنیا میں سب سے اچھی کمائی ہوتی ہے

اس دنیا میں جو قدم اٹھاؤ یہ سوچ کر ہی اٹھانا
پاؤں پھسل جائے تو کیسی جگ ہنسائی ہوتی ہے

نفس کو زنجیروں میں جکڑو گر آزادی منشا ہے
نفس پہ قابو پا جانا ہی بندے کی رہائی ہوتی ہے

مرنا جینا مرگ و شادی جو کچھ اس دنیا میں ہے
بس دو دن کی ہاؤ ہو دو دن کی دہائی ہوتی ہے

جھوٹ ریا کاری اور دھوکہ آخر کب تک چلتا ہے
ہاں لیکن جو قائم رہتی ہے وہ سچائی ہوتی ہے

جذب و ایماں اور جرات کی مٹی سے چنوائی گئی
مومن غازی کی صف گویا سیسہ پلائی ہوتی ہے

عظمٰی ایسی باتوں میں کتنی سچائی ہوتی ہے
دنیا سے کیا دل داری دنیا ہرجائی ہوتی ہے