یہ بازی عشق کی

تمہارا ہو تو ہو لیکن ہمارا ہو نہیں سکتا
تمہارے بعد اپنا تو گزارا ہو نہیں سکتا

کمالِ ضبط ہی میں ہے وفا کی آبرو ساری
جو آنسو آنکھ سے ٹپکے ستارا ہو نہیں سکتا

یہ بازی عشق کی بازی ہے اس میں سب منافع ہے
خسارا ہو بھی جائے تو خسارا ہو نہیں سکتا

یہ رشتہ جو بھی ہے دل کا فقط اِک بار بنتا ہے
یہ ایسا واقعہ ہے جو دوبارہ ہو نہیں سکتا

تمہاری خوامخواہ کی ضد ہے اس کو مان کر آخر
کنارا کر تو لیں لیکن کنارا ہو نہیں سکتا

یہ کیسا بوجھ جو ہر گھڑی سینے پہ رہتا ہے
یہ کیسا دُکھ ہے جس کا چارہ ہو نہیں سکتا