اجکل

دولت دا پرچار اے اجکل
پیسے دی بھرمار اے اجکل

حق انصاف نئیں کدھرے مِلدے
ظُلم دی مارو مار اے اجکل

جھُوٹ نوں سچ جو ثابت کردے
وڈا اوہ قلمکار اے اجکل

جہیڑا گندیاں جُگتاں کردا اے
وڈا ، اوہ فنکار اے اجکل

مطلب کَڈھ کے ٹُر جاندے نے
کیہڑے قول قرار نے اجکل

پَچھلے وقتاں وچ ہندے سن
کِدھر ٹُر گئے یار نے اجکل

جیہڑے مُنہ تے مِٹھے بَندے
سَب دے اوہ دِلدار نے اجکل

ماپیاں وَرگی چھاں نئیں کوئی
دسدا سَب نُوں ذوالفقار اے اجکل