بکھرے ہیں میری آنکھ سے اشکوں کے ستارے

بکھرے ہیں میری آنکھ سے اشکوں کے ستارے
اے کاش کوئی اپنا بھی اب چاند۔۔۔۔۔ اُتارے

جذبات کی موجیں میرے قابو میں۔۔ نہیں ہیں
شاید یہ تلاطم کسی طوفاں کو۔۔۔۔۔۔ اُبھارے

کیا خُوب ہے یہ عشق کہ صحرا میں ہے۔ مجنوں
اب کون ہے جو لیلٰی کی زلفوں کو۔۔۔ سنوارے

اُبھرے گا اِسی کفر کی ظلمت میں سے۔۔ سورج
وہ غارِ حِرا دور سے کرتا ہے۔۔۔۔۔۔۔ اشارے

تزئینِ چمن خون کے چھینٹوں ہی سے ۔۔۔ہو گی
نکھرے گا گلستاں مگر خوں سے۔۔۔۔۔ ہمارے

خود بڑھ کے سرِ دارکو چومیں گے۔۔۔۔ عزیزو
دنیا سے نرالے ہیں یہ انداز۔۔۔۔۔۔۔ ہمارے

گرتے ہیں رہِ حق میں شہیدوں کے جو قطرے
یہ خون کے قطرے ہیں کہ طوفان کے دھارے

اب حامی و ناصرہے فقط۔۔۔۔۔۔۔۔ تُو ہی ہمارا
نکلے ہیں خُدایا تیری رحمت کے۔۔۔۔ سہارے