جو، بہ رہا ہے رگوں میں نظر نہیں آتا

جو، بہ رہا ہے رگوں میں نظر نہیں آتا
دل، آئینہ ہے تو کیوں عکس بر نہیں آتا

ترے سِوا ہو تصور میں منزلِ دیگر
مجھے تو ایسا کوئی بھی سفر نہیں آتا

یونہی دہکتی رہیں گی یہ سرخ سرخ آنکھیں
سکون بخش، اگر ‘خواب گر‘ نہیں آتا

یہ سانس سانس شہیدِ دمِ تناسُخ ہے
کہُوں تو کیسے دعا میں اثر نہیں آتا

سمیٹ لاتا ہے کیفیتِ دمِ جاناں
کسی بھی دم، کوئی دم بے خبر نہیں آتا

میں لے کے آؤں گا پھر سے اسی زمانے کو
اگرچہ، لمحہ کوئی لوٹ کر نہیں آتا

انگشتِ خار زدہ سے کروں گا خوں یاری
کہ شاخِ وَرۡد پہ جب تک ثمر نہیں آتا