جیسے بھی حالات بدلتے

جیسے بھی حالات بدلتے
لیکن میرے ساتھ وہ چلتے

جانے کس کی نظر لگی ہے
جل گیا گلشن پھولتے پھلتے

مٹ گئیں ہاتھوں کی ریکھائیں
ان کے ہجر میں ملتے ملتے

تنہائی میں سرد رتیں بھی
کٹ جائیں گی جلتے جلتے

جس نگری کے وہ باسی تھے
ہم اس سے کس طور نکلتے

اپنی صورت بھول گئے ہم
روز نیا اک بھیس بدلتے

جو کرتے تھے گل افشانی
وہ بیٹھے ہیں زہر اگلتے

گلشن میں رت کیسی آئی
مالی ہیں خود پھول مسلتے

چھاؤں دیتے پیڑ یہاں پر
دیکھ رہا ہوں جلتے بلتے

جانے کس دم شام ہو جاۓ
زیست کا سورج ڈھلتے ڈھلتے

بدل گئے سب دیپک راہیں
لوگ ملے جو چلتے چلتے