عدو کے ساتھ وہ الفت کہ دوستی حیراں

عدو کے ساتھ وہ الفت کہ دوستی حیراں
یہ داغ داغ محبت، کہ عاشقی حیراں

نگاہ ناز کا انداز ساقیانہ ہے
چھلکتے جام پریشان ، مے کشی حیراں

نگہ ملا کے اشاروں سے گفتگو اُس کی
کہے بغیر وہ باتیں کہ خامشی حیراں

سُروں کے نام پہ بکھرا وہ شور غل جس سے
ترانہ سنج پریشان، نغمگی حیراں

سجود ہیں کہ یہ عادت ہے شیخ صاحب کی
جبیں کا داغ پریشان، بندگی حیراں

یہی کہ اُس کا اُٹھا تھا خمیر مٹی سے؟
اسی پہ ناز ہے اظہر کو ، آدمی حیراں