محاذوں پر اترنے کا ارادہ بھول سکتا ہے

محاذوں پر اترنے کا ارادہ بھول سکتا ہے
کنیزیں ساتھ ہوں تو شہزادہ بھول سکتا ہے

غنیمت ہے کہ میرا نام بھولا ہے فقط اس کو
وگرنہ وہ تو اس سے بھی زیادہ بھول سکتا ہے

اسے کچھ دن تواتر سے کسی زنداں میں لے جاؤ
اسی صورت وہ اپنا گھر کشادہ بھول سکتا ہے

تم اس کے کاغذی میثاق سے دھوکہ نہ کھا لینا
وہ بستی کو اماں دینے کا وعدہ بھول سکتا ہے

سواروں میں اگر تم سب غذا تقسیم کر دو گے
تو پھر جنگی اصولوں کو پیادہ بھول سکتا ہے