مرے وجود کی مٹی ہے بے قرار کہاں

مرے وجود کی مٹی ہے بے قرار کہاں
عدم کے دشت میں اڑنے لگا غبار کہاں

ترے جنوں کے حوالے یہ دشت دل کر دوں
ترے جنوں پہ مگر مجھ کو اعتبار کہاں

مجھے بھی اپنی محبّت پہ اعتبار نہیں
تجھے بھی دل کے تقاضوں پہ اختیار کہاں

وہ جس سے عشق حقیقی کی راہ کھلتی ہے
ترے نصیب میں لیکن وہ انتظار کہاں

تری یہ ضد کہ محبّت اٹل حقیقت ہے
مرا سوال ، کوئی شے بھی پایدار کہاں

نہ روک مجھ کو کہ چلنا تو میری فطرت ہے
ہوا کے گرد بناتا ہے یہ حصار کہاں

نہ ڈھونڈ دل میں مرے چاہتوں کے سرخ گلاب
خزاں کے گھر میں ملے گی تجھے بہار کہاں