کس طرح یہ دل ہوا تم پر فدا، لکھ جاؤں گا

کس طرح یہ دل ہوا تم پر فدا، لکھ جاؤں گا
اپنی پیشانی پہ اپنی ہر خطا لکھ جاؤں گا

نیک نامی آپ کی قائم رہے گی اِس طرح
آپ کو معصوم، میں خود کو برا لکھ جاؤں گا

لوح پر مجھ سے خدا، لکھوائے گر میری رضا
وہ ہمیشہ خوش رہیں میں یہ دعا لکھ جاؤں گا

تجربہ جس سے مرے دل نے بہت پایا سرور
دیکھنا اُن کی حیا کی انتہا، لکھ جاؤں گا

میں وصیَّت میں لحد اپنی سجانے کے لیے
ہو کفن میرا فقط اُن کی ردا، لکھ جاؤں گا