اب تو خود سے نا آشنا ہیں ہم

اپنے دل کی اگر صدا ہیں ہم
کچھ تمہاری بھی تو دوا ہیں ہم

اب میسر ہے گہری تنہائی
اب تو خود سے نا آشنا ہیں ہم

غم کا شکوہ نہ کیجئے صاحب
اپنی حالت میں مبتلا ہیں ہم

ہو ہی جائیں گے ہم خیال کبھی
ایک دوجے کے ہم نوا ہیں ہم

پڑھ لی زندان میں نمازِ عشق
کیا اسیری سے اب رہا ہیں ہم

بے وفائی پہ مرگئے تیری
پھر بھی کہتے ہو بے وفا ہیں ہم

فاصلے ہیں یہ زندگی بھر کے
زندگانی کا فاصلہ ہیں ہم

خود کو طوفاں میں آزمائیں کیا
ساحلوں کا ہی تو سرا ہیں ہم

خوفِ دنیا نکال کر دل سے
دیکھو دنیا کا آسرا ہیں ہم

جانے کس حال میں ہے شہزادہ
جس کی خواہش میں ہی فنا ہیں ہم

بے اثر ہے مری دعا وشمہ
گھٹتی سانسوں کی اک صدا ہیں ہم