زندگی کےغم کا درماں اور ہے

زندگی کےغم کا درماں اور ہے
دل میں بھی اس بار طوفاں اور ہے

میں بھی اس کی عید میں شامل نہیں
میری بھی یہ عید قرباں اور ہے

جب زمیں سے تازگی جاتی رہی
آسماں کا اب نگہباں اور ہے

جل رہے ہیں درد کے دل میں دئیے
اور چہرے پر چراغاں اور ہے

اس نے بھی بدلی وفاؤں کی ڈگر
میری چاہت کا بھی ایماں اور ہے

تیرے دل کی قید میں رہنا نہیں
اب مری دنیا کا زنداں اور ہے

آؤ وشمہ ہم بھی اپنی راہ لیں
اس کے دل میں آج مہماں اور ہے