Kal Ki Baat Ko Kal Per Chhoro

Kal Ki Baat Ko Kal Per Chhoro
Aatay Waqt Ko Kiss Ne Dekha?
Mustaqbil Pe Zor Hai Kis Ka?
Kal Aay Ga,Kal Dekhain Gay
Aaj Tu Jee Lain In Lamhon Ko
Jin Lamhon Ki Khatir Hum Ne
Maazi Ko Qurbaan Kia Hai

In Lamhon Ko Jee Ker Dekho
Zakhmon Ko Ab See Ker Dekho
Kaisay Wasl Ke Jaam Bharay Hain
Socho Na Ab,Pee Ker Dekho

Kya Kerna Andesha E Mehshar
Fikr E Farda Ke Kya Maani
Mutaqbil Per Zor Hai Kis Ka
Kal Aai Ga,Kal Dekhain Gay

Chhin Chhin Jharnay,Mast Hawain
Mehki Si Pur Soz Fizaain
Urtay Gaatay Bekal Panchhi
Geet Khushi Ke Mil Ker Gaain
Badal ,Barkha,Khusboo,Titli
In Ghariyon Ko Chhoonay Aain
Hum Na Hon Tu Kaon Sametay?
In Lamhon Ki Shokh Adaain

Charhta Sooraj Jhoomta Aai
Kab Doobay Ga Hum Kya Jaanain?
Shaam Ki Baatain Shaam Ko Hongi
Soch Ki Chadar Hum Kiyoon Taanain?
Fikr E Farda Rehnay Bi Do
Shaam Pari Hai,Raat Pari Hai
Dil Ki Ik Ik Baat Pari Hai
Khwaab Puraanay Sab Keh Daalain
Kal Ki Baat Bi Ab Keh Daalain