Kuch Ajeeb Falsafa Muhabbat Mein Us Ka Tha

Woh Muhabbat Ko Peristish Ka Maqam Deta Tha
Aur Guzrey Qisson Ko Ibadat Ka Darja Samajhta Tha
Kehta Tha Muhabbat Mein Koi Gharz Posheeda Nahi Hoti
Muhabbat To Begharz Aur Lafani Hoti Hai
Kuch Ajeeb Falsafa Muhabbat Mein Us Ka Tha Keh
Woh Meri Muhabbat Ka Talib Bhi Tha
Aur Main Usey Matloob Bhi Na Thi
Kehta Tha Keh Main Us Ki Rooh Mein Jazb Hoon Aisey
Keh Mujh Ko Paney Ki Us Ko Hasrat Bhi Nahi

Ajeeb Shakhs Tha Kuch Ajeeb Si Us Ki Kahani Thi
Yeh Dor Ab Aisi Muhabbaton Ka Nahi Raha
Milan Ke Baghair Muhabbatoon Ka Kia Tasawwer Hai
Deed Ke Baghair Chahaton Ka Kia Rang Hai
Yeh Dor To Faqat Aghraz Pe Mabni Hai
Meri Muhabbat Bhi Sirf Chaar Din Ki Kahani Thi
Koi Gari Aik Hi Station Pe Hamesha Naheen Rukti
Waqt Key Sath Khiyalat Badaltey Jatey Hain
Muhabbat Baqi Rehti Hai Mehboob Badaltey Jatey Hain

Main Ne Chaha Keh Khiyalat Us Ke Badal Daloon Aur
Muhabbat Ki Haqeeqi Tasweer Dikha Doon Us Ko
Woh Muhabbat Ka Pujari Tha Main Ne
Us Ko Tanhai Ki Saza De Dali

Mujhey Yaqeen Hai Woh Sota To Ho Ga Magar
Neend Us Ki Ankhon Mein Na Utarti Ho Gi
Mehfil Mein Woh Muskarata To Ho Ga Magar
Us Tabassum Mein Ik Tees See Uthti Ho Gi
Aankh Mein Aansoo To Nazar Na Atey Hongey
Palkon Taley Ik Barish Zaroor Hoti Ho Gi
Meri Yaad To Us Ki Khoon Ki Gardish Ke Saath Thi
Dil Dharakta To Hoga Magar Ik Aah Bhi Nikalti Ho Gi

Kiyun Sochti Hoon Yeh Sab Kuch Main
Jo Talluq Tha Woh To Mein Ne Tor Dia
Woh Zinda Rahey Na Rahey Mujhe Is Se Kia
Us Ki Saans Rukey Ya Chaley Mujhe Kia Lena
Mere Liye To Faqat Yehi Kafi Hai Keh
Main Aik Dunya-Daar Larki Aur
Woh Kisi Doosri Dunya Ka Baasi Tha