Main Teri Baat Pay Hairaan Hun

Main Teri Baat Pay Hairaan Hun Dilgeer Nahin
Yaani Jazbaat-E-Mahabbat Mein Bhi Taseer Nahin

Zindagi Teri Ghulami Mein Basar Ho Jaaye
Is Se Barh Kar Mere Maalik Koi Tauqeer Nahin

Khwab-E-Fardaa Hi Ki Taskeen Pay Palny Waalo
Koi Taqdeer Bajuz Koshish-O-Tadbeer Nahin

Teri Nafrat Ka Zeher Is Mein Nahin Mil Sakta
Yeh Mera Jaam Hai Zaahid Teri Jaageer Nahin

Shiddaton Mein Gham-E-Duniya Ki Tha Woh Zeher Ke Ab
Yaad-E-Jaanaan Bhi Meri Rooh Ki Akseer Nahin

Bas Yunhi Raat Abhi Subho Mein Dhal Jaayegi
Waqt Taqdeer Hai , Kuchh Waqt Ki Taqdeer Nahin

Aye Mudabbar Tu Mahabbat Ka Hi Payghaam Suna
Sar Pe Shamsheer Sahi , Haath Mein Shamsheer Nahin