Wo Kaon Thi?

Naghma E Tayyoor Tha
Noor Ka Zahoor Tha

Baad E Saba Thi Chal Rahi
Jawani Thi Machal Rahi

Patton Ka Ajab Shor Tha
Mehv E Raqs Mor Tha

Motiyon Ki Kitaab Thi
Moti Kya Sharaab Thi

Wo Ik Nigah Jo Pari
Wo Kaon Thi Wahan Khari?

Wo Hoor E Bajamal Thi
Nasha Tha ,Aik Jaal Thi

Wo Husn Kya Tha Teer Tha
Badan Bi Ghazl E Meer Tha

Main Paas Uss Ke Aa Gya
Khumaar Mujh Pe Chha Gya

Hos Meray Kho Gay
Hawas Meray So Gay

Haath Uss Ka Main Ne Thaam Ker
Kaha Keh Ai Noor E Nazar

Tu Kaon Hai Mujh Ko Bata
Lab Tu Hila Kuchh Tu Bata

Kehnay Lagi Wo Gulbadan
Ai Jaan E Jaan,Ai Jaan E Man

Main Pyaar Hoon,Qaraar Hoon
Goya Ke Rooh E Bahaar Hoo

Aa Mujh Ko Aa Ke Thaam Le
Aur Yeh Le Aik Jaam Le

Main Ne Baghair Soch Ke
Aqal Ko Apni Noch Ke

Ussi Ko Hamsafar Liya
Ussi Ko Zad E Rah Liya

Main Uss Main Hi Gumm Ho Gya
Ussi Main Qalb Kho Gya

Phir Aik Din Kya Huwa
Mast Tha Soya Huwa

Chupke Se Mujh Ko Chhor Ker
Naata Mujh Se Tore Ker

Chali Gai,Chali Gai
Wo Dard Mujh Ko De Gai

Kaghaz Tha Ik Wahan Para
Jis Pe Tha Likha Huwa

Duniya Mera Naam Hai
Yahi Mera Kaam Hai