ادائیں، گفتگو کرنے لگی ہیں

ادائیں، گفتگو کرنے لگی ہیں
بلائیں، گفتگو کرنے لگی ہیں

قریب آ کر، مرے چہرے پہ چھا کر
گھٹائیں ، گفتگو کرنے لگی ہیں

محبت رنگ لائے گی کبھی تو
وفائیں گُفتگو کرنے لگی ہیں

سمٹ کر ہو گئیں معدوم دیکھو
قبائیں گُفتگو کرنے لگی ہیں

کرم زنداں کا ہم پر اس قدر ہے
ہوائیں ، گفتگو کرنے لگی ہیں

جبیں، سجدے سے یوں ہی اُٹھ نہ جانا
دعائیں ، گفتگو کرنے لگی ہیں

نہیں دعویٰ خدا سے گُفتگو کا
عطائیں ، گفتگو کرنے لگی ہیں

سُدھر تُو کیوں نہیں جاتا ہے اظہر
خطائیں گُفتگو کرنے لگی ہیں​