اداس دل ہے بہت تم جو میرے پاس نہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ لڑکا ۔۔۔۔۔۔۔۔۔۔۔۔۔۔۔۔۔۔۔۔

اداس دل ہے بہت تم جو میرے پاس نہیں
تمھارے بن تو مجھے زندگی بھی راس نہیں

وہ چاندنی میں نہائی ہوئی جواں راتیں
رہیں نہ پہلی سی اپنی حسیں ملاقاتیں
ملن کی کوئی بھی صورت،کوئی بھی آس نہیں

اداس دل ہے بہت تم جو میرے پاس نہیں

نہ دن گزرتا ہے اب نہ ہی رات کٹتی ہے
تمھاری یادوں کی ہر پل گھٹا برستی ہے
یہ روح پیاسی ہے ظاہر لبوں سے پیاس نہیں

اداس دل ہے بہت تم جو میرے پاس نہیں
تمھارے بن تو مجھے زندگی بھی راس نہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ لڑکی ۔۔۔۔۔۔۔۔۔۔۔۔۔۔۔۔۔۔۔۔۔۔۔

تمھاری ہو نہ سکی تم سے آج ہے دوری
بتاؤں کیسے تمھیں کیا ہے میری مجبوری
نہ کہنا اے میرے ہمدم کہ میں اداس نہیں

تمھارے بن تو مجھے زندگی بھی راس نہیں

رہے گی میرے لیے زندگی شب ویراں
جدا ہوں تم سے تو دل میں نہیں کوئی ارماں
غموں کی رات ہے دل کو سحر کی آس نہیں

تمھارے بن تو مجھے زندگی بھی راس نہیں
اداس دل ہے بہت تم جو میرے پاس نہیں