تمہیں دل سے بھلانے میں ابھی کچھ وقت لگے گا

تمہیں دل سے بھلانے میں ابھی کچھ وقت لگے گا
سب ہی یادیں مٹانے میں ابھی کچھ وقت لگے گا

بڑی چاہت سے جو تم نے میرے دل میں جگایا ہے
وہ ہی جذبہ سلانے میں ابھی کچھ وقت لگے گا

جلا ڈالا ہے ایک پل میں جس نے روح و بدن کو
اس آتش کو بجھانے میں ابھی کچھ وقت لگے گا

بہت نزدیک آ ئے ہیں وہ جو دل میں سمائے ہیں
ان ہی سے دور جانے میں ابھی کچھ وقت لگے گا

محبت کے بنا بھی زندگی اچھی گزرتی ہے
یہی خود کو سمجھانے میں ابھی کچھ وقت لگے گا

پرانے مسئلے اپنے سبھی سلجھا کے بیٹھے ہیں
نئی الجھن سلجھانے میں ابھی کچھ وقت لگے گا

بہت ناراض ہے عظمٰی میرا دل مجھ سے آج کل
میرے دل کو منانے میں ابھی کچھ وقت لگے گا