دل کھو گیا ناں؟؟

بہت تھا ناں تم کو ناز دل پر
پلک جھپکتے میں کھو گیا ناں؟

وہ وقت کا اک حسیں شگوفہ
نظر میں تارے سمو گیا ناں؟

خیال اسکا،نکھار اسکا
وہ مہکا مہکا خمار اسکا

سمے کے ہر اک گزرتے پل میں
جنوں کے جگنو پرو گیا ناں؟

وہ جو بہاروں کا تھا چمن سا
وہ اک اجالا کرن کرن سا

وہ تیرا مخمور بانکپن سا
سبھی پرایا ہی ہو گیا ناں؟

جو لے کے آیا ترے معانی
وہ جس کی تو نے قدر نہ جانی

وہ جاتے جاتے تری رگوں میں
وفا کے موسم سے بو گیا ناں؟