دل کی بستی کو دیکھ کر خاموش

دل کی بستی کو دیکھ کر خاموش
رہ نہیں پائی چشم تر خاموش

دن بھی اتنا ہی شور کرتا ہے
رات ہوتی ہے جس قدر خاموش

جونہی بے باکیاں حیا سے ملیں
شرم تھی گویا تربتر خاموش

شاخ دھڑکن کی سوکھتی جائے
دل کاجب سے ہوا شجر خاموش

دل کا کلمہ لگا کے کان سنو
گوبظاہر یہ ہے حجر خاموش

اِذن پرواز کا بھی مل جاتا
ہوگئے آپ کے ہی پر خاموش

رہزنی بولتی ہے سر چڑھ کے
جب بھی ہوتے ہیں راہبر خاموش

ظلمتوں کی تو عید ہوتی ہے
جوں ہی ہوتی ہے اک سحر خاموش

کل گیا بستی ء خموشاں میں
کیا بتاوں تھے کتنے سر خاموش

بولنے لگ گئے سبھی گونگے
ان کو محفل میں دیکھ کر خاموش

نیند میں آتا ہے دبے پاوں
آج بھی مفتی خواب گر خاموش