دل کے صندوق میں چھپی باتیں

دل کے صندوق میں چھپی باتیں
میں نے کہہ دی ہیں ان کہی باتیں

تُو نے جو جو کہیں رقیبوں سے
پسِ دیوار وہ سُنی باتیں

جب بھی اڑتی ہے پیار کی خوشبو
سب سے کرتی ہے روشنی باتیں

میں بیاضِ جنوں میں لکھتی رہی
اپنے اشعار ، آپ کی باتیں

جان دے دوں گی میں تری خاطر
یاد رکھیے گا یہ مری باتیں

میں حقیقت ہوں ہے مجھے یہ خبر
مجھ سے کرتی ہے زندگی باتیں

نیم شب اس دیارِ فرقت میں
وشمہ کرتے ہیں سب تری باتیں