رخ کہانی کا اچانک تو نہ موڑا ہوتا

رخ کہانی کا اچانک تو نہ موڑا ہوتا
مر ہی سکتے ہمیں اس حال میں چھوڑا ہوتا

دل نے ہر چیز ہمیشہ ہی مکمل چاہی
درد بھی کیسے گوارہ اسے تھوڑا ہوتا

اب جو ٹوٹے ہیں تو آنکھوں میں بہت چھبتے ہیں
کاش خوابوں سے تعلق ہی نہ جوڑا ہوتا

سیل اشکوں کا بہا کر تجھے لے جاتا کہیں
ہم نے دامن کو اگر یار نچوڑا ہوتا

تیرے ماتھے کو جو دیکھوں تو خیال آتا ہے
کوئی تارہ ہی فلک سے کبھی توڑا ہوتا

تیری رسوائی کا ہوتا نہ اگر ہم کو خیال
بارہا سر تیری دہلیز پہ پھوڑا ہوتا